Tla ki Pauren

LAMKAANG KSENMII PAU KPUNLOR

15 February, 2017

Lamkaang Literature Society ava mpha mruk thung ngi m’nong mdo arvan thlot mangi mlei kurthukda kum 2013 thungki ngi pṭhunda Lamkaang pam thung ngi npau in kinṭim sappi tpau t’the nraan ki kurchuk kirthe piik tdit lu arvan thloon nu ka’am. Neen Lamkaang pau rukka dultipaam thung ngi pauna kinvei kchran ki pau kurthukda avangi mlei kurthuk da Lamkaang pau tpun lorma ro me kidingi tarvan thlot kurthuk. Lamkaang pau mkinvei chaak bi Ksenmii ki nonaat ungta milai rek ava rukka kinvei chlam ra tdit ava mii rekki mde phaak in.

Kum 2014 thung ngi npau inn sitonda tpunlorma ro me kidingi Lamkaang Naga Kver Kunpun (LNKK), Lamkang Kurchuknau Kunpun (LKK), Lamkaang Snu Lop (LSL), Lamkang Naga Baptist Association (LNBA), Lamkang Catholic Association (LCA), ungta Lamkang Translators limmi thleng lamda Lamkaang Pau Tkurchuna' Lop (Lamkaang Language Education Commiṭee) ava mdo seem in. Jangkum ki 2016 thung rongi Lamkaang Literature Society ava seem lamda m’nong ava tun-tun va Lamkaang Pau Tkurchuna' Lop ava Lamkaang Literature Society kurdu ngi mnong mthlot meek ka.

Pam thungki ka’am Ksenmii ki Lamkaang Naga Kver Kunpun (LNKK), Lamkang Kurchuknau Kunpun (LKK), Lamkaang Snu Lop (LSL), Lamkang Naga Baptist Association (LNBA), Lamkang Catholic Association (LCA), ungta Lamkang Translators rek ruk va tuni kpha thung ngi soklo lamda Ksen pau tsinton nrangki ungta mkuonlor nrangki mnong marvan thlot meek daan na.

Hava mkurdu ki t’the ava rekka tuun-tuun Literature Society le Pau Kurchukna’ Lop pi mdo thlot meek in ava;

  1. Lamkaang Ksenmii Jiikbul (Alphabet) ava kulrot na ki dil ktoi ji kutu dokka.
  2. Lamkaang Ksenmii ki tikjitna ki ungta tpauna ki no lam ava rukka mi paam ki kidei rek tu kartaak nada kutu dok ka.
  3. Lamkaang pau vi “Mkhatna Laika” (My First Bible) ava rukka ma’am bong le kthuuk rang ngi ka’am data.
  4. Lamkang keyboard ava IT Expert rekki Jiikbul ki di kthoiji mseem dok inna.
  5. Mkhat naki neen Lamkang website ava www.lamkaang.com dida ka’am dokka. Mknit naki www.ksenmii.org di donle ka’am noolra. Hava website knit thung ngi neen Ksenmii ki mlei pau-prin mkheng dal inche kidingi kulrot na ka’am ma.
  6. “Lamkang Dictionary” dida tuun-tuun kavang meek data. Kbeiji tudok so kidingi mnong ngi kvang meek datta.
  7. Alraang ki pi-pu pau rek (legends, folk and fairy tales) rek kutu dok ra mtheja.
  8. Lamkang kardaam ki, nee laa kthe ki, saa armin tulo naki, LNBA le LCA foundation ungta paumin rek ki mleiji DVD kutu dok ra mtheja. Hava DVD mtut dat le mpaam-mpaam ki Ksenmii rekki kultuul lam donle tupthu ra kidingi kulrot na ka’am ma.
  9. Jangkum ki March 2016 thungngi Lamkang nau rekki tummi Lamkaang Pau Tkurchuna' Lop le Lamkaang Churches rekki kurdu ngi Staff Notation Course 6 (six) months ki ava Russia ki Ocha rek oon lamda kutu dokka. Nirla-tarthlaang mii 30 som kdum arveel li Course ava mpchaan dok inna.

Lamkaang mii khimkheiji Isoor hintha npau in tsinton ungta mkunlor nrangki rin ktham chaan che. Mii rek mnong kthlo khim khei ava le rukka soklo chaan che mleija m’man re kava arda man ka’am kme. Lerki International Specialist kthleng rek rukka arda man ka’am kme. Hava mnong thlot in khimkhei ava plung kprol rekki mdo bom de naraan rin ktham piik inche. Mleija mche mthloon naan, mdo chaak mdo neek raan avale’ khim kheija plung kprol rek dopiik chaak mkur thu lei.

Naanki,

Lamkaang Pau Tkurchuna' Lop